شعر حلمنتيشي

( شعر حلمنتيشي )

اسمع فهذا الشعر حلمنتيشي =هو سكر والله سنترفيشي
فيه الهزار وفيه أيضا حكمة= وأنا شاعر فحل وزيه مفيشي
أفكاره هي كالجواهر والنبي= خذها بلا ثمن ولا بقشيشي
اضحك فان الضحك كالياميشي= في طعمه والكحك والقراقيشي
اضحك صباحا أو مساء مغربا= ليلا بلا بخل ولا تحويشي
اضحك لأصحاب لأهل اخوة= اضحك لي ولو حتى متعرفنيشي
اضحك اذا كانت أمامك لحمة =أو كنت متغدي بجبنه قريشي
واذا ضحكت أنا متسألنيشي =عما يضحكني ولا تحوشنيشي
اضحك تجد دنياك بنتا حلوة= وقفت بتضحك لك ولا بتمشيشي
اضحك أمام مراية ترى طلعة= كالبدر أو أحلى بلا تهويشي
اضحك وكل مشا تحس كأنه= جاتوهة والجيم بالتعطيشي
بوز وكل عسلا تحس بحنضل= أو علقم في البق والنغاشيشي
بوز تجدها غولة بمخالب =بالضرب تنزل فيك والتلطيشي
بوز أمام مراية ترى سحنة= كالقرد والله ما تعجبنيشي
اني صديق الضحك أجرى خلفه= وأبكي له لو فات ولا شافنيشي
ويزورني في بيتنا وأزوره= في بيته لو غاب أو مايجيشي
اني عدو الحزن لو أنا شفته= في سكة أجري ما يلحقنيشي
وأسك شباكي اذا ست بكت =أو صوتت بزجاجه والشيشي
لاتزعلوا فالحزن ليل ضلمة =والضحك بدر أحمر طرابيشي
والضاحكين عقولهم موزونة= والزعلانون عقولهم مناويشي
ان الحياة حديقة بزهورها= وطيورها ذات الغنا والريشي
هي جنة وبنات حور حولنا= تبدي حلاوتها ولا تخبيشي
لو شمسها غابت ينور بدرها= ونجومها فالنور ما بيطفيشي